Tre skitarët tanë, Kiana Kryeziu, Arba Pupovci dhe Drin Kokaj, të cilët po e përfaqësojnë Kosovën në Festivalin Olimpik Evropian për të Rinj (EYOF) Vuokatti 2022, kanë garuar sot në disiplinën e sllallomit.
Kiana Kryeziu pjesëmarrëse në Lojërat Olimpike Dimërore Pekini 2022, zuri vendin e 48-të nga 84 pjesëmarrëse. Ajo la pas vetes nëntë garuese, kurse 13 të tjera nuk e përfunduan shtegun në lëshimin e parë ose të dytë.
Ajo përfundoi me kohë 1 minutë e 46.56 sekonda, +17.82 sekonda prapa vendit të parë.
Arba Pupovci ishte e pafat, pasi në lëshimin e parë doli nga shtegu.
Në konkurrencën e meshkujve, Drin Kokaj, zuri vendin e 53-të nga 84 garues, 30 prej të cilëve u diskualifikuan.
Koha e tij pas dy lëshimeve ishte 1 minutë e 48.72 sekonda, plus 19.17 sekonda nga vendi i parë. Në lëshimin e dytë, Drini përmirësoi kohën e tij, duke qenë plus shtatë sekonda nga vendi i parë, për dallim nga plus 12 në lëshimin e parë.
Për Drinin, pjesëmarrja në EYOF Vuokatti 2022 është një përvojë e mirë për garat e ardhshme ndërkombëtare.
Përzgjedhësi Agim Pupovci u shpreh i kënaqur me paraqitjen e Kianës dhe Drinit, derisa veçoi paraqitjen e Kianës.
Skitarët tanë, nesër do të garojnë në kualifikime të sllallomit paralel.
