I dërguari i Shteteve të Bashkuara të Amerikës për Ballkanin Perëndimor, Gabriel Escobar dhe ai i Bashkimit Evropian, Miroslav Lajçak gjatë kësaj jave ishin për vizitë në Kosovë, ku janë takuar me liderët e shtetit, pas tensionimit të situatës në veri dhe vendosjes së barrikadave.
Po gjatë kësaj jave Kosova ka aplikuar për anëtarësim në Bashkimin Evropian, saktësisht më 15 dhjetor, datë kjo që u konsiderua historike.
Ndërkaq, të premten Gjykata Speciale dënoi me 26 vjet burgim ish ushtarin e Ushtrisë Çlirimtare të Kosovës, Salih Mustafa.
Vizita e Escobarit dhe Lajçakut në Kosovë
I dërguari i Shteteve të Bashkuara të Amerikës për Ballkanin Perëndimor, Gabriel Escobar dhe ai i Bashkimit Evropian, Miroslav Lajçak gjatë kësaj jave ishin për vizitë në Kosovë.
Escobar, është deklaruar pas takimit me kryeministrin e Kosovës Albin Kurti, ndërkaq theksoi se është koha që të diskutohet për fillimin e themelimit të Asociacionit të komunave serbe dhe se këtë tha ai, ia ka bërë të qartë edhe kryeministrit të Kosovës, Albin Kurti.
“Ne duhet të fillojmë të flasim për zbatimin e Asociacionit, e kam bërë shumë të qartë këtë. Shpresoj se do të kemi një zgjidhje shumë afër në të ardhmen në këtë krizë”.
Escobar tha se shpreson që të ketë shpejt një zgjidhje për krizën aktuale në veriun e Kosovës ndërsa i shprehu mbështetje propozimit evropian për normalizimin e marrëdhënieve ndërmjet Kosovës dhe Serbisë.
Ndërkaq, në një intervistë për REL, Escobar tha sot se Kosova ka garanci shumë të forta të sigurisë nga Shtetet e Bashkuara.
SHBA-ja, thotë ai, e kundërshton dhe e refuzon në mënyrë kategorike kërkesën e Serbisë për kthimin e forcave të saj në Kosovë.
“Ne e kundërshtojmë këtë në mënyrë kategorike. Ne e refuzojmë këtë në mënyrë kategorike. Nuk e mbështesim fare. Dhe, po ashtu, dua të them se Kosova ka garanci shumë të forta të sigurisë nga Shtetet e Bashkuar”, tha ai
Escobar tha se barrikadat në veri të Kosovës, duhet të hiqen nga njerëzit që i kanë ngritur ato, por kërkon nga Qeveria e Kosovës që të gjejë mënyra për të adresuar shqetësimet e komunitetit serb në veri.
E pas takimit me Escobarin dhe Lajçakun janë deklaruar edhe nga Qeveria e Kosovës, të cilët theksuan se ka dakordim që duhet të hiqen barrikadat në veri.
Pas takimit është deklaruar për media edhe i dërguari i BE-së, Miroslav Lajçak, ndërsa tha se preferon rrugën diplomatike për heqjen e barrikadave në veri, dhe jo përmes buldozerëve.
Aplikimi për anëtarësim në Bashkimin Evropian – shtetet e para që shprehën mbështetje për Kosovën
Krerët e shtetit të mërkurën nënshkruan aplikimin për anëtarësimin e Kosovës në Bashkimin Evropian në një ceremoni zyrtare të organizuar në ambientet e Presidencës së Kosovës, ndërkaq të enjten në Pragë, kryeministri i vendit, Albin Kurti ia dorëzoi aplikimin e Kosovës zyrtarëve të Republikës së Çekisë, shtet ky që kryeson Presidencën e Këshillit të BE-së.
Në Pragë, Kurti është pritur nga ministri për Çështje Evropiane të Çekisë, Mikulas Bek me të cilën kanë biseduar për procesin e integrimit të Kosovës, çështjen e liberalizimit të vizave dhe zhvillimet tjera.
E mbështetja e parë për Kosovën për këtë hap erdhi nga vet shteti i Çekisë që deri në fund të dhjetorit kryeson me Presidencën e Këshillit të BE-së.
Ministri Bek tha se është nder për të që të pranojë aplikimin e Kosovës për anëtarësim në BE.
Ai ka theksuar se Presidenca çeke në 6 muajt e fundit i ka vënë vëmendje të jashtëzakonshme Ballkanit Perëndimor.
“Është nder për mua si kryetar i Këshillit të BE-së të pranojë aplikacionin e Kosovës. Na vjen mirë që kemi arritur të avancojmë tutje çështjen e liberalizimit të vizave për Kosovën. Na vjen mirë që është arritur konsensus Këshilli me Parlamentin Evropian për këtë çështje. Është kënaqësi e jashtëzakonshme…”, ka thënë Bek, duke shtuar shteti i tij e mbështetë Kosovën drejt rrugës evropiane.
E në ditën kur Kosova dorëzoi aplikimin për anëtarësim në BE, mbështetje erdhi nga Shqipëria, Kroacia, Mali i Zi, Austria, Finlanda e Estonia, etj.
Salih Mustafa dënohet me 26 vjet burgim nga Gjykata Speciale
Gjykata Speciale e dënoi të premten me 26 vjet burgim, ish-pjesëtarin e Ushtrisë Çlirimtare të Kosovës, Salih Mustafa nën pretendimin se ka kryer krime lufte.
Në njoftimin e Gjykatës Speciale thuhet se trupi gjykues e shpalli Mustafën fajtor për krimet e luftës të ndalimit arbitrar, torturës dhe vrasjes së paligjshme dhe e dënoi me 26 vjet.
Kur shqiptoi vendimin, Trupi Gjykues nënvizoi se akuzat në këtë çështje gjyqësore kanë të bëjnë vetëm me përgjegjësinë penale individuale të Mustafës dhe përfshirjen e tij në krimet e pretenduara të ndalimit arbitrar, trajtimit mizor, torturës dhe vrasjes së paligjshme të viktimave.
Duke vënë në dukje se viktimat në këtë çështje janë shqiptarë kosovarë, Trupi Gjykues gjithashtu theksoi se “përpjekjet e tyre për të gjetur drejtësinë dhe të vërtetën janë thelbi i këtij procesi”.
Krimet për të cilat, Mustafa u shpall fajtor ndodhën në prill 1999 në një kompleks në fshatin Zllash, në Kosovë, i cili përdorej si bazë nga njësiti gueril BIA i Ushtrisë Çlirimtare të Kosovës (UÇK), komandant i të cilit ishte Mustafa.
E reagime të shumta ka pasur në vend pas dënimit të Mustafës.
Kryeministri i Kosovës, Albin Kurti, në një postim në Facenook e ka quajtur këtë verdikt indinjues, ndërsa ka thënë se është e papranueshme kur “çlirimtarin na e gjykojnë më rëndë se agresorin gjenocidal”.
“Ky verdikt është indinjues. Cili është mesazhi që i jep ky verdikt ukrainasve që sot luftojnë kundër agresorit? Mbetem me shpresën se institucionet e pavarura të drejtësisë do ta kuptojnë padrejtësinë dhe do të reflektojnë në shkallët e tjera të gjykimit”.
“Lufta e çdo populli kundër pushtuesve e okupatorëve është e drejtë universale. Është e papranueshme kur çlirimtarin na e gjykojnë më rëndë se agresorin gjenocidal. Sot e gjithmonë jemi solidarë me luftëtarët dhe me UÇK-në tonë”, ka shkruar ai në Facebook.
Pas dënimit, ka reaguar edhe Fadil Fazliu – bashkëluftëtar i Salih Mustafës.
Sipas Fazliut, kjo gjykatë është duke e barazuar viktimën me agresorin me dënimin e ish-komandantit të UÇK-së “Calit”.
“Gjykata Speciale është gjykatë politike, sepse mendimi im edhe shumë shokë të luftës është se kjo gjykatë është duke bërë një baraspeshë duke barazuar viktimën me kriminelin”, ka thënë ai.
Më tutje, Fazliu ka deklaruar se Serbia ka qenë ajo që ka bërë krime dhe jo Ushtria Çlirimtare e Kosovës.
Sipas tij, të gjitha dëshmitë kundër Mustafës kanë qenë të fabrikuara dhe të paguara mirë. /Telegrafi/