Kryeprokurori Special i Malit të Zi, Milivoje Katniq, ka thënë se prokuroria do të hetojë nëse ka pasur një përpjekje për korrupsion politik në çështjen e udhëheqësit të Lëvizjes Qytetare URA dhe tanimë zëvendëskryeministrit të Malit të Zi, Dritan Abazoviq.
Më 3 dhjetor, Abazoviq ka thënë për Vijesti se informacioni i mëparshëm i medias se atij iu ofruan 21 milionë euro, si ryshfet, ishte e vërtetë, por ai nuk donte të thoshte se kush i kishte ofruar paratë, përcjell Telegrafi.
“Prokuroria speciale do të ndërmarrë veprime të caktuara në periudhën e ardhshme për të verifikuar këto akuza. Ne sigurisht do të vendosim në ditët në vijim nëse do t’i dërgojmë një ftesë Abazoviqit për të ndarë njohuritë e tij”, citohet të ketë thënë kryeprokurori special, Milivoje Katniq, për të përditshmen malazeze, “Dan”.
Dhe sipas REL në gjuhën serbe, pasi Katniq tha se do të hetojë çështjen e tij, Abazoviç i tha atij të hënën, më 7 dhjetor, se ai ishte “i lirë të bënte punën e tij” pa specifikuar nëse ai do t’i tregonte prokurorit se kush ishte personi që pretendohet se i kishte ofruar atij ryshfet.
“Unë pres që Katniq dhe unë do të takojmë njëri-tjetrin këtë javë,…”, u ka thënë Abazoviq gazetarëve në Budva.
Ndryshe, pas pretendimeve të Abazoviqit se atij iu ofrua një ryshfet miliona dollarësh, të dy partitë në pushtet dhe opozita reaguan, duke kërkuar që ai të njoftojë se kush i ofroi paratë dhe që prokuroria të reagojë urgjentisht me atë rast.
Madje avokati Nikola Martinoviq ka deklaruar se Dritan Abazoviq, nëse zbuloi se dikush po i ofronte para për të bërë diçka të paligjshme, ai duhej t’i raportonte ato tek autoritetet kompetente, përndryshe ai rrezikon përgjegjësi penale. /Telegrafi/