Danimarka ka pezulluar marrëveshjen e nënshkruar me Kosovën, për marrjen me qira të 300 qelive në burgun e Gjilanit.
Siç raportojnë mediat në Danimarkë, marrëveshja është pezulluar në kohë të pacaktuar.
“Sipas një komunikate të Shoqatës së Burgjeve, ka mungesë financimi për projektin në fjalë”, raportojnë mediat atje.
Kosova dhe Danimarka më 20 dhjetor 2021 nënshkruan një letër-pëlqim, sipas të cilit Danimarka do të merrte me qira për 10 vjet 300 qeli në Gjilan.
Marrëveshja ishte përcjellë me kritika nga shoqatat e të drejtave të njeriut në Danimarkë. Ministri i Drejtësisë i Danimarkës, Nick Haekkerup, kishte nënshkruar traktat që Danimarka të marrë me qira 300 qeli në Kosovë.
Lidhur me këtë marrëveshje, Telegrafi javë më parë kishte pyetur Ministrinë e Drejtësisë se në çfarë faze ndodhet. Nga MD kishin bërë të ditur se ekipet e të dy vendeve janë në përfundim të negocimit të aspekteve të marrëveshjes.
“Aktualisht ekipet e dy vendeve janë në përfundim të negocimit të aspekteve të marrëveshjes për financimin e projekteve për investimet në energjinë e ripërtritshme, si dhe projekteve në fushën e sundimit të ligjit në Kosovë”, kishte deklaruar Flamur Pireva, këshilltari i ministres Haxhiu. /Telegrafi/