I cilësuar si një prej yjeve të mëdha të muzikës shqiptare, si nga publiku ashtu edhe nga kolegët, Ramadan Krasniqi – Dani sot (5 gusht) i ka mbushur 62 vjet.
Vital, shumë elegant, me vullnet, i gatshëm për të vazhduar, me bagazh prej më se 41 albumesh muzikore, me dhjetëra hite të pavdekshme, ditëlindja e 62-të e gjen këngëtarin me shëndet e zemrën plot me familje, nipa e mbesa.
Kush nuk e njeh më Ramadan Krasniqin-Danin, i lindur në Pejë, më 5 gusht të vitit 1958, i cili këndon me aq afsh e dashuri, duke u bërë i dashur dhe i adhuruar për pleq e të rinj dhe për çdo gjini – raporton Njëshi.
Më 49 vjet punë, Dani që moti nuk është vetëm i Pejës dhe i Dukagjinit, por i mbarë njerëzimit, sepse zëri i tij arrin të depërtojë te çdo njeri që ka pak shije dhe kritere për muzikë. Me kontributin e tij në vazhdimësi, ai edhe sot e tutje vazhdon karrierën, i orientuar në këtë sezon vere në dasma, ahengje e gëzime familjare.
Me krejt bagazhin e tij ndër dekada, këngëtari vazhdon të mbetet personalitet që shënon fuqishëm kohën e vet. Në përvjetorin e ditëlindjes së 62-të, Dani ka marrë qindra mesazhe urimi, nga njerëz të thjeshtë, artistë, miq, adhurues e ku nuk kanë munguar as urimet nga politikanë të vendit.
Me dallim nga vitet e kaluara, sikur çdo këngëtar, edhe Danin, ky sezon e gjen më tepër se asnjëherë më parë pranë familjes, meqë pandemia globale COVID-19, ka bërë që ahengjet, dasmat dhe angazhimet muzikore të anulohen kudo.
