Ballkani ka marrë fitoren e parë në grupet e Ligës së Konferencës, teksa ka mposhtur Sivassporin me rezultat 3-4.
Ka qenë një ndeshje shumë e mirë nga skuadra kosovare që ka krijuar raste pa fund dhe sikur mos t’i shpërdoronte të gjitha mundësitë e ofruara do të siguronte fitoren edhe më herët.
Armend Thaqi, Arbër Potoku, Meriton Korenica dhe Ermal Krasniqi ishin autorët e golave për kampionin në fuqi të Kosovës në këtë sfidë ndaj Sivassporit.
Pas ndeshjes trajneri Ilir Daja ka thënë se kanë gjetur forcë për të reaguar përkundër barazimit në minutat e fundit të vendasve.
“Futbollistët e Ballkanit ja dedikojnë gjithë Kosovës dhe ngritjes së futbollit në Kosovë këtë fitore. Këta djem kanë personalitet, karakter. Me gjithë se kishim gjithë ato mungesa, lojtarët që u futën e vazhduan atë përpjekje që bënë lojtarët e formacionit. Të mungoi kapiteni, Gripshi, Astrit Thaqi, Bekteshi dhe Leo Abazinuk është e lehtë, por i përballuam”, ka theksuar Daja.
Tutje trajneri shqiptar tha se futbollistët kanë fituar eksperiencë, derisa ka kërkuar përkrahje nga e gjithë Kosova.
“Ajo që do të veçoja është që kemi prodhuar lojë dhe kemi pasur shumë situata para portës. Nëse do ishim më cinik do ta mbyllnim ndeshjen më herët. Lojtarët kanë fituar përvojë në një nivel tjetër”.
“Ekipet janë të forta dhe kanë përvojë. Kur ke besim te vetja dhe djemtë tanë kanë besim te vetja dhe respektin ndaj vetes atëherë kjo gjë është shumë e mirë. Karakterin sportiv këta djem e kanë në nivelin optimal”, ka shtuar trajneri që ka kthyer Ballkanin në forcë të futbollit kosovar dhe jo vetëm.
Ballkani ka katër pikë tani në grup sa Sivasspori dhe Slavia Pragës, derisa ndeshjen e ardhshme e luan në Prishtinë përballë ekipit turk. /Telegrafi/