Ballkani ka marrë një fitore të lehtë në udhëtim te Feronikeli ’74 me rezultat të thellë 0-3.
Almir Kryeziu, Edvin Kuc dhe Nazmi Gripshi u përkujdesën për tre golat e suharekasve duke i dhënë tre pikë skuadrës së tyre.
Trajneri Ilir Daja pas ndeshjes ka thënë se nuk patën një pjesë të parë të mirë shkaku edhe energjisë së shpenzuar në mesjavë, derisa ka thënë se ndryshimet e bëra i dhanë suksesin ekipit.
“Pjesa e parë jo e mirë vjen nga energjia e konsumuar me Astanan. Në Evropë ka tjetër ritëm dhe të merr shumë energji”.
“Na vjen mirë që luajtëm në një fushë si kjo, sepse është ndryshe të luash në fushë me terren natyral. Feronikeli kishte rastet për të na vështirësuar ndeshjen”.
“Kemi reaguar mirë me ndryshimet që bëmë në pjesën e dytë, disa prej tyre janë lojtarë të formacionit bazë. Pas ndeshjes së vështirë në Evropë, të fitosh në këtë stadium është gjë e mirë”.
“Na mbetet të vazhdojmë me këtë ecuri sepse planet po shkojnë mirë në të dyja garat”, ka deklaruar Daja pas ndeshjes. /Telegrafi/