Peter Crouch ka qenë njëri nga futbollistët më të njohur anglez, pasi ishte një sulmues karizmatik.
Sulmuesi anglez i dha fund karrierës së tij edicionin e kaluar në moshën 38-vjeçare ku së fundmi luajti për Burnleyn.
Crouch ka luajtur për 11 klube të ndryshme, ku ndër to ishin edhe skuadrat e famshme angleze si Liverpool, Tottenham Hotspur apo Aston Villa.
Megjithatë legjenda braziliane Ronaldo, nuk ia ka pasur idenë se kush ishte Crouch dhe këtë e ka zbuluar ish-sulmuesi anglez.
39-vjeçari ka zbuluar për mediat angleze se ishte takuar me Ronaldon në ibiza, ku ish-ylli i Interit, Realit e Milanit ishte duke pirë birra në shoqërinë e një bukuroshes.
“Isha në pushime në Ibiza dhe e pash Ronaldon në plazh. Ishte duke pirë birra dhe po tymoste cigare. Sapo e mbaronte një birrë, super modelja që e shoqëronte ia sillte tjetrën dhe thash me vete se është një mundësi e madhe për mua të prezantohem para tij”, deklaroi Crouch.
Anglezi e pranon se kishte menduar fillimisht se do të njihej nga Ronaldo, por braziliani nuk e kishte idenë se kush ishte Crouch.
“Shpresoja shumë që të më thoshte ‘Oh, ti je Peter Crouch’, por Ronaldo nuk e kishte idenë se kush isha. E bëra një foto dhe u largova pa i treguar se jam futbollist”.
Crouch ka zhvilluar 42 ndeshje me Anglinë duke shënuar 22 gola, ndërsa në fund tha se do të ishte e jashtëzakonshme të luante përkrah Ronaldos.
“Do të kishte qenë e jashtëzakonshme të luaja përkrah Ronaldos, pasi ka qenë njëri nga më të mirët i të gjitha kohërave”, përfundoi Crouch. /Telegrafi/