Nënkryetarja e Partisë Demokratike të Kosovës, Vlora Çitaku, ka reaguar lidhur me ngjarjet e fundit të ndodhura në kryeqytet ku mbrëmjen e së mërkurës janë kryer dy vrasje.
Në reagimin e saj Çitaku ka thënë se “dikush duhet të japë përgjegjësi për këtë shkallë të pasigurisë”.
“Dy vrasje brenda natës në kryeqytet. Përtej dhimbjes dhe solidaritetit me familjarët e viktimave, dikush duhet të japë përgjegjësi për këtë shkallë të pasigurisë. Vrasje, plaçkitje, rrahje gjithandej. E tmerrshme”, ka shkruar ajo në Facebook.
Ndryshe, të mërkurën mbrëma kanë ndodhur dy vrasje të rënda në kryeqytet të cilat kanë tronditur vendin.
Njëri rast ka ndodhur në rrugën “Ali Vitia”, ku një person është therur me thikë për vdekje nga dhëndri i tij.
Ndërkaq rasti tjetër ka ndodhur në rrugën “Dalip Alshiqi”, ku një grua ka mbetur e vrarë si pasojë e një grabitjeje të armatosur, gjersa nga vetura kanë arritur të largohet burri me dy fëmijët. /Telegrafi/