Chelsea e ka informuar Conor Gallagher se ai nuk do të stërvitet më me ekipin e parë pas rikthimit nga turi parasezonal të cilin po e zhvillojnë në Amerikë.
Gallagher, i cili iu bashkua Chelseat në moshën tetë vjeçare, ishte njëri prej lojtarëve më të dalluar nën urdhrat e Mauricio Pochettinos sezonin e kaluar, duke startuar në 37 ndeshje në Ligën Premier.
Ai fitoi një vend në ekipin e Gareth Southgate në Euro 2024 dhe u paraqit në katër ndeshje për ‘Tre Luanët’, duke përfshirë fitoren dramatike ndaj Holandës në gjysmëfinale.
Por para fillimit të sezonit të ri, e ardhmja e Gallagher në ‘Stamford Bridge’ tashmë është vënë në dyshim.
Mesfushori ka refuzuar dy oferta të rinovimit të kontratës nga Chelsea këtë verë, duke përfshirë një kontratë dy vjeçare.
Chelsea ka pranuar një ofertë nga Atletico Madridi prej rreth 33 milionë eurosh, por gjithçka ka mbetur pezull pasi klubi spanjoll nuk ka marr dritën e gjelbër nga lojtari.
Vlen të theksohet se 25-vjeçari është i hapur që të qëndrojë tek Chelsea në rast se i ofrohet një kontratë afatgjatë.
Por megjithatë, ka shqetësime nga bordi i klubit se ai nuk mund të jetë titullar i rregullt nën urdhrat e Enzo Marescas, i cili së fundmi e transferoi Kiernan Dewsbury-Hall në ekipin e tij./Telegrafi/