Ekipi brazilian Chapecoense ka konfirmuar se do të luajë në ndeshjen e Trofeut Joan Gamper në muajin gusht në nder të 71 personave që kanë vdekur nëntorin e kaluar.
19 lojtarë të Chapecoenses ishin në mesin e atyre që vdiqën pasi aeroplani i klubit u rrëzua në Kolumbi në rrugën e tyre drejt ndeshjes së parë të Copa Sudamericana kundër Atletico Nacional.
Presidenti i klubit brazilian, Plinio David de Nes Filho ka thënë në një intervistë në mars se Barcelona ishin skuadra e parë që ofruan solidaritet pas tragjedisë.
“Barcelona ishte skuadra e parë që tregoi solidaritet me ne, dhe për momentin është e vetmja skuadër që na ka ndihmuar financiarisht me 250 mijë euro”, ka thënë Nes Filho për Cadena Ser.
Blaugranët i ftuan gjithashtu ata në këtë ndeshje miqësore, e cila do të mbahet në Camp Nou më 7 gusht, për të ndihmuar rindërtimin institucional dhe sportiv të skuadrës nga Amerika Jugore.
Kjo ndeshje do të pasojë ndeshjet ndërkombëtare të Kupës së Kampionëve në Shtetet e Bashkuara të Amerikës kundër Juventusit, Manchester Unitedit dhe Real Madridit. /Telegrafi/