Jamie Carragher i ka thënë Manchester Unitedit që të shesë Cristiano Ronaldon për të shmangur një “gabim më të madh”.
Ronaldo bëri rikthimin e tij të shumëpritur në Old Trafford nga Juventusi në afatin e verës së kaluar, me Unitedin që shpenzoi 20 milionë funte për të ri-nënshkruar sulmuesin portugez.
Gjatë periudhës së tij të parë te Unitedi midis 2003 dhe 2009, Ronaldo u bë një legjendë e klubit duke shënuar 118 gola dhe duke fituar tre tituj të Ligës Premier dhe një të Ligës së Kampionëve, por rikthimi i tij në shtëpi ka qenë disi zhgënjyes.
Unitedi përfundoi i dyti në Ligën Premier sezonin e kaluar, por aktualisht është në vendin e pestë nën drejtimin e trajnerit të përkohshëm Ralf Rangnick, dhe gjithashtu ka pësuar eliminime të hershme nga Carabao Cup dhe FA Cup.
Ronaldo u kritikua për gjestet e tij gjatë thatësirës prej gjashtë ndeshjeve pa gol përpara se të rikthehej te goli në mënyrë spektakolare, ndërsa Djajtë e Kuq mposhtën Brighton 2-0 të martën.
Carragher mendon se cirku mediatik që ndjek 37-vjeçarin pas çdo paraqitjeje po pengon zhvillimin e përgjithshëm të skuadrës.
“Kontributi i paçmuar i Cristiano Ronaldos në fitoren e Manchester Unitedit në Ligën Premier ndaj Brighton ishte një tjetër kujtim i oreksit të tij të pashembullt për gola”, ka thënë fillimisht Carragher për The Telegraph.
“Por, kjo nuk e ndryshon këtë realitet: United bëri një gabim duke ri-nënshkruar me Ronaldon verën e kaluar. Do të jetë më i madh nëse e mban atë sezonin e ardhshëm”, përfundoi anglezi. /Telegrafi/