Ish-mbrojtësi i Juventusit, Fabio Cannavaro, nuk është i sigurt nëse Bianconerët janë favoritë ndaj Villarrealit në sfidën e sotme (e martë).
Zonja e Vjetër zhvillon sfidën e parë të 1/8 së finales në Ligën e Kampionëve si mysafir i Nëndetëses së Verdhë në Estadio de la Ceramica.
Matthijs de Ligt do të jetë qendërmbrojtësi i vetëm në fushë, duke qenë se Leonardo Bonucci nuk është në gjendje të luajë nga minuta e parë, derisa Giorgio Chiellini dhe Daniele Rugani janë të lënduar.
Për këtë arsye, partner i 22-vjeçarit në qendër të mbrojtjes pritet të jetë Danilo. Cannavaro e ka lëvduar holandezin para ndeshjes.
“Ai di si të mbrohet në gjerësi, nuk ka frikë nga asgjë dhe është përmirësuar shumë së fundmi. Liga jonë (Serie A) është taktike dhe shumë e vështirë. Madje edhe lëvizjet në fushë ndryshojnë, është gjithçka ndryshe”, ka deklaruar Cannavaro për La Gazzetta dello Sport.
Në dy sezonet e fundit, Juve është eliminuar në këtë fazë, ndërsa edhe pse nuk ka pësuar humbje qe 12 ndeshje në Serie A, kampioni i botës nuk e konsideron favorit në takimin ndaj ekipit spanjoll.
“Kush mund ta thotë këtë? Klubi spanjoll është mësuar të fitojë në Evropë, nuk do të jetë një ndeshje e lehtë. Çuditërisht, Juventusi ka gjithçka për të humbur, megjithëse jam i bindur se Bianconerët kanë gjithçka u nevojitet për t’u kualifikuar”, ka thënë tutje Cannavaro. /Telegrafi/
Cannavaro su De Ligt: "E' fortissimo. Ha fisico e istinto e crescerà ancora" https://t.co/eLyK0GMRP3
— La Gazzetta dello Sport (@Gazzetta_it) February 22, 2022