Maqedonia e Veriut ka bërë arritje të rëndësishme në aspektin e tranzicionit energjetik në të kaluarën, duke zbatuar disa reforma dhe duke ndjekur vizionin e saj për ndërtimin e një sistemi energjetik të besueshëm, efikas, miqësor ndaj mjedisit dhe konkurrues që do të kontribuojë në rritjen e qëndrueshme ekonomike. Në fakt, Maqedonia e Veriut është Pala e parë kontraktuese që ka dorëzuar Planin e saj Nacional për Energji dhe Klimë në Sekretariatin e Komunitetit të Energjisë, theksoi Fatmir Bytyqi në fillim të Forumit të Energjisë së Maqedonisë – FEM 2022.
Ai theksoi se tashmë është përgatitur një Strategji për Zhvillimin e Energjisë deri në vitin 2040, e cila bazohet në pesë dimensionet e Unionit të Energjisë dhe është e para e këtij lloji në mesin e palëve kontraktuese të Komunitetit të Energjisë.
“Përveç kësaj, ne jemi aktivisht të përfshirë në disa procese të zhvillimit dhe zbatimit të disa projekteve të mëdha dhe strategjike të rëndësishme të energjisë së rinovueshme që do të garantojnë sigurinë dhe diversifikimin tonë të energjisë, duke u larguar nga lëndët djegëse fosile.
Po përballemi me kohë sfiduese të cilat mund t’i kalojmë vetëm me bashkëpunim rajonal dhe miqësi të sinqertë!”, tha Bytyqi.
Forumi Energjetik Maqedonas FEM 2022 mbahet sot dhe nesër në Ohër dhe pritet të marrin pjesë më shumë se 50 panelistë vendas dhe ndërkombëtarë, ekspertë, përfaqësues të lartë institucionalë dhe faktorë të tjerë kyç në sektorin energjetik në gjithsej shtatë panele, kurse fokusi kryesor i edicionit të sivjetmë është zbutja e krizës aktuale energjetike nëpërmjet një tranzicioni të drejtë dhe demokratik energjetik./Telegrafi/