Deputeti i LDK-së, Shpejtim Bulliqi – njëherësh ekspert i gjeografisë dhe një nga zërat kryesorë kundër vijës së demarkacionit të caktuar nga ekipet e Qeverisë së Kosovës – ka reaguar pas asaj që ka thënë kryeministri Mustafa.
- LEXO PO ASHTU: Mustafa: SHBA i di kufijtë e Ballkanit e jo do eksperta tanë që as megjat e tokave të tyre s’i kanë shkru
Ai ka thënë se në mbledhjen e KP të LDK-së është diskutuar kalimthi, ku janë diskutuar faktet nga terreni, vërejtjet dhe brengat rreth atij procesi, transmeton Koha.net.
Isa Mustafa ka thënë më parë se ekspertët vendorë nuk i kanë as vijat e tokave të tyre të vëna, e jo më të vendosin kufinjtë e vendit. Por, Bulliqi ka kthyer përgjigje në këtë deklaratë të Mustafës.
“Të vetmit që ishin dhe janë kundër këtyre fakteve dhe në një forme bënin përpjekje për ta arsyetuar këtë proces si ‘të drejtë’ dhe ‘në dobi’ të territorit të Kosovës ishin ata të cilët nuk kanë njohuri profesionale për procesin dhe mendimet e të tjerëve i marrin si të gatshme pa i shtjerrë të gjitha faktet dhe faktografitë shkencore dhe ligjore. Këto fakte dhe faktografi janë te punuara dhe publikuara nga institucionet shtetërore dhe të sigurisë të një periudhe kohore ku baballarët tanë dhe shërbyesit e atij shteti as që kane guxuar t’i vënin në pikëpyetje dhe tani, kur janë në dobi të Kosovës, përpiqen t’i hedhin si të pasakta”, ka thënë Bulliqi në llogarinë e tij në Facebook.
Ai në fund thotë se “opinionit të gjerë i bëjmë me dije edhe njëherë se hartat, faktet dhe dokumentacionet e shfrytëzuara nuk janë tonat, por janë te ish-Jugosllavisë, SHBA, Britanisë se Madhe, Gjermanisë, Rusisë, te cilat dëshmon vërtetesën e kufirit deri me 31.12.1988”.