Ekipi i Romës ka shprehur interesimin për të nënshkruar me Leonardo Bonuccin i cili momentalisht aktivizohet në radhët e Union Berlinit.
Bonucci u largua nga Juventusi gjatë afatit kalimtar veror në atë që konsiderohej si ‘largim i ashpër’ dhe përfundoi duke iu bashkuar ekipit gjerman Union Berlin, aty ku ai nuk po gjen hapësirë në formacion, përkundër rezultateve të dobëta të klubit.
La Gazzetta dello Sport ka raportuar se Bonucci mund të largohet nga Gjermania në afatin kalimtar të janarit, edhe pse ai ka nënshkruar një marrëveshje njëvjeçare me klubin gjatë verës.
Veterani është i interesuar për një rikthim në Itali dhe Roma mund të jetë destinacioni i tij i ardhshëm.
“Giallorossët” janë duke u ballafaquar me probleme në fazën e mbrojtjes për shkak të lëndimeve dhe suspendimeve, duke shtuar këtu edhe buxhetin e limituar.
Drejtori sportiv Tiago Pinto dëshiron që të nënshkruajë me një mbrojtës në janar dhe është duke konsideruar opsionet më të lira në treg, por që mund të shtojnë konkurrencën brenda ekipit.
Bonucci po konsiderohet si opsion më i lirë sesa Arthur Theate i Rennes dhe Chalobah i Chelseat.
Flamengo janë të interesuar për shërbimet e Matias Vina dhe Roma mund të ndërpresë në gjysmë huazimin e tij tek Sassuolo, për të mbushur arkat e klubit dhe ta bëjnë të mundur transferimin e Bonuccit./Telegrafi/