Zëvendëskryeministri i Parë i Kosovës për Integrim Evropian, Zhvillim dhe Dialog, Besnik Bislimi, mirëpriti sot në takim emisarin e Gjermanisë për Ballkanin Perëndimor, Manuel Sarrazin.
Gjatë këtij takimi bëhet e ditur se Bislimi e njoftoi emisarin Sarrazin për përkushtimin e Kosovës në dialogun me Serbinë.
Përsa i përket raundit të fundit të bisedimeve, Bislimi theksoi se Kosova ka qenë e përkushtuar të arrihet një marrëveshje permanente për çështjen e targave të veturave, duke i respektuar praktikat dhe standardet më të mira të Bashkimit Evropian.
Por, sipas tij, marrëveshja nuk është arritur për shkak të mungesës së vullnetit dhe propozimit konkret nga Serbia.
“Kjo reflektoi interesimin e tyre për të bllokuar arritjen e kësaj marrëveshje dhe respektimin e marrëveshjes së Brukselit të 30 shtatorit. Kosova vazhdon të jetë konstruktive, kreative dhe e përkushtuar në këtë process”, tha ai, njofton qeveria.
Në përfundim të takimit, thuhet se zëvendëskryeministri Bislimi shprehu mirënjohje për angazhimin e Sarrazin në Ballkanin Perëndimor dhe rolin e rëndësishëm të shtetit të Gjermanisë. /Telegrafi/