Fansat e stilit unik të Billie Eilish së shpejti mund të kenë në dorë atlete të dizajnuara nga vetë këngëtarja.
Dje (e martë), ylli 19-vjeçar njoftoi për lansimin e ardhshëm të dy modeleve të atleteve Air Jordan në bashkëpunim me Nike, të dyja do të jenë 100 për qind vegane, si vetë Eilish, dhe të përbëra nga më shumë se 20 për qind materiale të riciklueshme.
Eilish i tha Nike se Air Jordan 15 ka qenë stili i saj i preferuar. “Kur i mora, i shikova sikur të kisha një milion dollarë para meje”, tha ajo.
Versioni i saj vjen në një ngjyrë monokromatike që i përshtatet estetikës së epokës së saj “Happier Than Ever”.
Këpucët përfshijnë logon e saj, të cilën e vizatoi kur ishte 14 vjeç; është paraqitur në shumicën e krijimeve të saj të kaluara.
Eilish është një përkrahëse e famshme e modës së qëndrueshme, kohët e fundit ka rënë dakord të veshë një fustan Oscar de la Renta në Met Gala 2021 me kusht që marka të ndalojë përdorimin e leshit në modelet e saj.
Këpucët e Eilish do të dalin së pari në shitje në store.billieeilish.com më 27 shtator dhe në Nike SNKRS më 30 shtator. /Telegrafi/