Janë zhvilluar edhe dy ndeshjet e fundit të javës së 20-të në elitën e futbollit kosovar.
Besa ka arritur ta mposhtë kampionin aktual Feronikelin me rezultat minimal 2:1.
Mysafirët të parët kaluan në epërsi, kur ish-sulmuesi i Besës Mark Milicaj shënoi një gol të bukur nga 25 metra.
Epërsia e mysafirëve nuk zgjati më shumë se 13 minuta, pasi pas një tollovie në zonën e tyre shënoi malazezi i besës Damijanovic për 1-1.
Në minutën e 58-të, golin e fitores për vendasit e shënoi kapiteni Fetim Kasapi.
Pas kësaj fitore Besa vazhdon të mbetet në pozitën e pestë por që tani ka 32 pikë të tubuara, pesë më pak se lideri Hajvalia.
Ndërkohë fitore të rëndësishme ka shënuar edhe Trepça ’89 si vendas përballë Drenicës 2-0.
Vendasit shënuan në minutat e para të ndeshjes, kur Mërgim Pevqeli harkoi bukur në zonë dhe Blerand Kurtishaj shënoi për 1-0.
Për golin e dytë u përkujdes Mërgim Pevqeli që shënoi me një gjuajtje të bukur në minutën e 66-të. /Telegrafi/
Besa – Feronikeli 2:1
Trepça ’89 – Drenica 2:0