Deputeti i Aleancës për Ardhmërinë e Kosovës, Ali Berisha, thotë se zyrtarët e institucioneve të Kosovës, janë duke ushtruar presion mbi deputetët e Kuvendit të Kosovës për ratifikimin e marrëveshjes së demarkacionit me Malin e Zi.
Përmes një reagimi për media, Berisha ka thënë se vota kundër demarkacionit me Malin e Zi, dëshmon qartë se deputetët janë përfaqësuesit e popullit, dhe si të tillë ata mbrojnë integritetin e vendit.
“Deputetët e parlamentit tonë, janë të vetëdijshëm se kjo marrëveshje nuk duhet ratifikuar, sepse si e tillë po e humb territorin e vet me mbi 8.8 mijë hektarë. Presionet publike dhe tendencat për të krijuar amulli në opinion, tregon se kjo është vetëm lojë politike, për t’ia zgjatur jetën vetvetes në pushtet, në të kundërtën, vota kundër kësaj marrëveshje dëshmon qartë se deputetët janë përfaqësuesit e popullit dhe si të tillë ata mbrojnë sovranitetin dhe integritetin e vendit”, thuhet në reagimin e Berishës.
Berisha konsideron se kontestet ndërkufitare përgjatë historisë së ish-Jugosllavisë, nuk kanë qenë pengesë për integrime euroatlantike.
Ai thotë se populli e ka kuptuar se komisioni qeveritar ka gabuar me ketë marrëveshje.
“Mos ratifikimi i kësaj marrëveshje i hapë rrugë një procesi të ri demokratik të rinegocimit, që në mënyrë të pavarur ta zgjidhë ketë kontest ndërshtetëror. Shembujt e shumtë në ish-Jugosllavi dëshmojnë se kontestet ndërkufitar në mes të shteteve nuk janë pengesë për integrime euroatlantike që janë synim i vetëm i popullit të Kosovës”, ka thënë ndër të tjerash Berisha.