Ish-zëvendësministri i Punëve të Jashtme, Anton Berisha, ka kritikuar kryeministrin e Kosovës, Albin Kurti, për vizitat e tij jashtë vendit, duke thënë se derisa ai “po bredhë në dynja”, vartësit e tij po bëjnë “kërdi” në buxhetin e shtetit.
Berisha po ashtu ka përmendur ritmin e rritjes së çmimeve në tregun vendor, duke thënë se është bërë tmerri i qytetarit kosovar.
“E përderisa ai është duke bredhur në dynja prej katedre në katedër, që vendin e vet, të cilin nga pozita e opozitarit e paraqiste të shkatërruar për 20 vjet, e nga pozita e qeveritarit e ligjëron si storie suksesi, vartësit e tij në Kosovë janë duke bërë kërdinë në buxhetin e Kosovës ndërsa ritmi i rritjes së çmimeve është i bërë tmerri i qytetarit kosovar”, ka shkruar ai në Facebook.
Tutje, ka thënë se kreu i ekzekutivit që dikur “nuk ka lënë gurë pa lëvizur dhe nuk ka lënë kënd pa gjuajtur me gurë, për të ardhur në pushtet”, tash po refuzon deri në sabotim që të merret me problemet e vendit të vet.
“E përkthyer në realitet, ai Kosovën është duke e dëmtuar për çdo ditë përderisa vetes është duke ia plotësuar, siç e tha një deputet i tij, ëndrrat e dëshirat personale hiç më pak se nga pozita e kryeministrit”, ka shtuar Berisha. /Telegrafi/
