Kryetari i Partisë Demokratike Sali Berisha e cilësoi dëshmi të rikthimit të proceseve staliniste, gjyqin ndaj deputetit të PD-së, Ervin Salianji.
Në një deklaratë për mediat, Berisha tha se PD-ja do ta kthejë në një çështje ndërkombëtare çështjen Salianji dhe nuk do të pranojë që në Shqipëri të rikthehen procese politike.
Kryetari i PD kërkoi ndjekje penale për ish-kreun e policisë Ardi Veliu dhe ish-funksionarëve të tjerë në kohën që ai drejtonte policinë si të përfshirë në ‘trafiqet e SHISH që manipulojnë dhe falsifikojnë prova”.
Berisha shprehet se Edi Rama bashkë me grupin mafioz Xhafaj duan t’ia marrin mandatin deputetit Ervin Salianji.
Çështja ‘Babale’ ishte një ndër temat më të nxehta të debatit politik në vitet 2017-2019 gjatë kohës kur Fatmir Xhafaj ishte ministër i Brendshëm.
Xhafaj u akuzua nga Salianji dhe PD se favorizoi vëllanë e tij Agron Xhafaj, të dënuar në Itali me 7 vjet e 4 muaj burg.
Pas daljes së përgjimeve, Agron Xhafaj u dorëzua tek autoritetet italiane duke shlyer dënimin e tij dhe tashmë është rikthyer në Shqipëri i lirë.
Deputeti Salianji u shpall fajtor për veprën penale kallëzim i rremë në lidhje me çështjen “Babale” dhe gjykata kërkoi 1 vit burg për të. /Telegrafi/
