Në Gjykatën Themelore të Prishtinës, sot është mbajtur shqyrtimi fillestar ndaj dy të akuzuarve për spiunazh, Bedri Shabani e Muharremi Qerimi.
Gjatë seancës gjyqësore Shabani e Qerimi janë deklaruar të pafajshëm.
Qerimi, i cili akuzohet edhe për armëmbajtje pa leje, për këtë pikë të aktakuzës e ka pranuar fajësinë.
Gjykata e ka aprovuar pranimin e fajësisë, dhe i ka njoftuar palët që në afat prej 15 ditësh mund të paraqesin kundërshtimet për hedhjen e aktakuzës, raporton Telegrafi.
Prokuroria Speciale e Kosovës në shkurt të 2025-së ka ngritur aktakuzë ndaj Bedri Shabanit dhe Muharrem Qerimit për veprën penale – spiunazh.
Më 5 qershor të 2024-s, Agjencia Kosovare për Inteligjencë (AKI) dhe Policia i kishin arrestuar të pandehurit në Ferizaj.
Ata dyshohet se kanë bërë spiunazh me Agjencinë e Inteligjencës Serbe (BIA).
Prokuroria pretendon se ka prova që Shabani ishte aktiv edhe ditën e sulmit terrorist në Banjskë, ku takoi një pjesëtar të policisë, të cilit i dha informata jorelevante dhe iu ankua se vazhdimisht po jep por nuk po merr informata nga policia.
Ai sipas aktakuzës ka pasur kontakt edhe me pjesëtarin e BIA-s dhe ish-shefin e policisë së Ferizajt, Bogolub Janiçeviq, i cili sipas prokurorisë ishte i përfshirë në masakrën e Reçakut. /Telegrafi/
