Është konfirmuar se Bayern Munichu nuk është dashur të paguajë asnjë shumë parash për huazimin e Joao Cancelos deri në fund të sezonit nga Manchester City.
Pas transferimit befasues në ditët e fundit të afatit kalimtar të janarit, janë mësuar detaje të tjera në lidhje me kalimin e portugezit në Bundesliga.
Mbrojtësi i Citizens iu bashkua kampionit gjerman në formë huazimi gjashtëmujor me opsion blerjeje për 70 milionë euro në fund të sezonit.
Drejtori sportiv i bavarezëve, Hasan Salihamidzic, ka konfirmuar për gazetarin e Sport Bild, Christian Falk, se nuk janë kërkuar para për huazimin duke treguar arsyen pse ka ndodhur kjo.
“Fakti që marrëveshja e Cancelos është bërë pa një çmim transferimi, është për shkak të rrjetit”, ka theksuar 46-vjeçari.
‘Rrjeti’ i cekur mes dy palëve mund të jetë krijuar gjatë transferimit të anësorit Leroy Sane, i cili në vitin 2020 ndërroi Mançesterin për Munihun.
Largimi i Cancelos nga Etihad Stadium, sipas The Athletic, ka ndodhur për shkak të prishjes së raporteve me trajnerin Pep Guardiola. /Telegrafi/