Deputeti i Lëvizjes Vetëvendosje, Dimal Basha ka reaguar pas deklaratës së deputetit Mërgim Lushtaku, i cili ka thënë sot se pushteti për inate politike po ia ndal ujin Drenicës.
Basha ka shkruar në Facebook se Lushtaku po flet për Skenderajn, kurse ai që 20 vjet e fundit ka blerë prona nga 50 euro ari, dhe ia ka shit prapë shtetit nga 5 mijë euro, transmeton Telegrafi
“Ngoni kush po fol për Skenderajin, Lushtaku Jnr, i dërguari i Lushtakut Snr, që komplet 20 vitet e fundit i ka kalu duke ble prona prej shtetit nga 50€ ari, e tu ia shit prap shtetit me nga 5,000€ ari. Ky jo buxhetin, po me ia lanë edhe ndërtesën e Kuvendit e shet me mujt për që mërzitet për dikon”, ka pohuar ai.
Ndryshe, deputeti Mërgim Lushtaku ka akuzuar Lëvizjen Vetëvendosje se për inate politike ia kanë ndalur ujin Rajonit të Drenicës.
“Shprehi keqardhje ndaj këtij votimi, LVV e ka ende një hatër mbetje ndaj një rajoni për shkak të votave që nuk ia kanë dhënë as në zgjedhjet qendror as lokale. Është për turp dhe ju po e tregoni fytyrën e vërtetë që jeni kundër Drenicës, vetëm po e rikujtoj së në kohën më të vështirë edhe aparati serb me Millosheviqin kanë dashtë me na ndal ajrin e jetën me na marrë. E ujin s’keni me mujt me na ndalë, është për turp çka keni bo sot me ketë votim, ia keni ndal ujin Drenicës për inati të politikës. Zgërdhihuni sa të doni. E keni tregu fytyrën të vërtetë, na kemi punu që me u realizu këtë”, është shprehur ai. /Telegrafi/
