Ish-kryeministri i Shqipërisë, Sali Berisha ka reaguar sot pas deklaratës së kreut të Partisë Demokratike, Lulzim Basha rreth rezultatit paraprak të zgjedhjeve të pjesshme lokale të mbajtura në 6 mars.
Në një njoftim në Facebook ku ka shpërndarë një video të Bashës që thotë se nuk ka humbur asnjë garë në jetën e tij, Berisha u shpreh se Basha është i vetmi njeri në botë që bën deklarata të tilla.
“Lulzim Basha është i vetmi njeri në glob që del i treti dhe deklaron se nuk ka humbur asnjë garë”, ka thënë Berisha.
Kujtojmë se kandidatët e PS-së kanë fituar deri tani në bashkitë e Vorës, Rrogozhinës, Lushnjës dhe Dibrës nga 6 bashkitë që kanë mbajtur zgjedhje, sipas Komisionit Qendror të Zgjedhjeve.
Sipas të dhënave të KQZ-së të përditësuara deri në orën 13:28, edhe në Durrës, kryeson kandidatja socialiste, Emirjona Sako, ndërsa në Shkodër, kandidati i “Shtëpisë së Lirisë”, Bardh Spahia. /Telegrafi/
