Patriot Rudari ishte zgjuar herët në mëngjes për të vazhduar misionin e tij human. Në rrethojat e oborrit të xhamisë së fshatit, po i varte qeset e mbushura me produkte ushqimore, të destinuara për kalimtarët të cilët janë në nevojë.
Rudari ka thënë kjo iniciativë është bërë në bashkëpunim me banorët e fshatit Shajkovc, për t’u solidarizuar sadopak me nevojtarët në muajin e shenjtë të Ramazanit.
“Sot, me rastin e ditës së parë të Ramazanit kemi vendosur që disa qese me gjëra ushqimore t’i vendosim në rrethojat e xhamisë për ata që vërtet kanë nevojë. Në këtë fshat banorët nuk kanë nevojë për këto ndihma, dhe në këtë rast ne kemi vendosur që këto ushqime t’i vendosim për fshatrat tjera që gravitojnë nga Podujeve dhe Batllava… Nëse iniciativa ka sukses, to t’i vazhdojmë edhe me ditët tjera”, tha për RTV Dukagjinin, Patriot Rudari.
Në këto qese janë të vendosura artikuj të ndryshëm ushqimor të destinuara për familjarët e fshatrave të tjera përreth.
Nuk është hera e parë që banorët e Shajkovcit, marrin të tilla iniciativa humane.
Bajram Mulolli, drejtor i shkollës së fshatit, ka thënë se zemërgjerësia e banorëve të këtushëm, është parë edhe në vitet e kaluara.
“Fshati Shajkovc është mjaft i organizuar në iniciativat humanitare. Për vite me radhë mërgimtarët tonë dhurojnë të holla, veshmbathje etj. Përgjatë kohës së luftës ky fshat ka strehuar mbi 50 mijë banorë nga gjithë Llapi… Kjo është një iniciativë nga shpirtmirësia e banorëve. Ata më parë kanë marrë modele nga Skandinavia për dhurimin e mollëve, ndërsa tash kanë marrë këtë iniciativë për muajin e shenjtë të Ramazanit, që të kenë frymën e humanitetit”, tha Bajram Mulolli.
Banori Patriot Rudari, ka thënë se nëse kjo iniciativë pëlqehet nga banorët e fshatrave përreth, do të vazhdojnë përgjatë gjithë muajit. /RTV Dukagjini/Telegrafi/
