Banka Botërore ka pezulluar botimin e indeksit të saj botëror të klimës së biznesit, pasi ka identifikuar “parregullsi” në të dhënat e saj, që mund të kenë ndikuar në renditjen e katër vendeve.
Raporti vjetor “Doing Business”, i nisur në vitin 2002, është bërë një matës me ndikim për të vlerësuar mjedisin e biznesit dhe konkurrencën relative të vendeve.
Renditjet e larta vlerësohen nga qeveritë që kërkojnë të tërheqin investime dhe gjetjet janë një motiv për krijuesit e politikave për të përmirësuar kushtet për biznes, përcjell Telegrafi.
“Një numër i parregullsive janë raportuar në lidhje me ndryshimet në të dhënat në raportet ‘Doing Business 2018’ dhe ‘Doing Business 2020’, të botuara në muajin tetor 2017 dhe 2019. Ndryshimet në të dhënat nuk ishin në përputhje me metodologjinë e ‘Doing Business'”, njofton Banka Botërore.
Si rrjedhojë, ky institucion tha se duhej të kryente një “rishikim sistematik” të pesë raporteve të fundit dhe kishte ndaluar botimin e atyre në të ardhmen derisa të përfundonte ky proces.
“Ne do të veprojmë bazuar në gjetjet dhe do të korrigjojmë përkatësisht të dhënat e vendeve që ishin më të prekura nga parregullsitë”, përfundoi BB.
Sipas raportit të fundit, Kosova radhitet në pozitën e 57-të nga 190 vende sa i përket lehtësisë së të bërit biznes, krahasuar me vendin e 44-të ku ka qenë vitin e kaluar. /Telegrafi/