Profesori universitar, Bekim Baliqi ka thënë se nuk ka bashkëpunime konkrete mes Kosovës dhe Shqipërisë në fushën ekonomike.
“Është një lloj parade politike [Kosovë – Shqipëri]. Arrihen marrëveshje me një ceremoni dhe mbesin aty. Bashkëpunimi më shumë është administrativ se politik”, tha Baliqi, në emisionin “Përballje” me gazetarin Muhamet Hajrullahu në RTV Dukagjini.
Baliqi thotë se Kosova dhe Shqipëria duhet të marrin modele të suksesshme të bashkëpunimit mes vendeve të ndryshme.
“Mund të merret modeli i bashkëpunimit i vendeve të ndryshme. Shembull bashkëpunimi franko-gjerman. Aty keni bashkëpunime konkrete shembull hekurudha. Te ne as që mendohet për projektin e hekurudhave”, tha ai.
Ai ka thënë se ka disa marrëveshje mes Kosovës dhe Shqipërisë që janë ripërsëritur por ka edhe disa çështje tjera që mes vendeve të BE-së janë harruar.
“Roamingu në BE sot nuk ekziston. Kemi shkolla të përbashkëta franko-gjermane, ku ka shkëmbim të arsimtarëve dhe profesorëve… Ne mund të flasim me patriotizëm, emocione etj., por hapa konkrete në këto marrëdhënie mes Kosovës dhe Shqipërisë nuk janë marrë, që qytetarët e vendeve tona t’i vërejnë”, tha Baliqi, përcjell Telegrafi.
Profesori universitar thotë se objektivi i shpallur nga qeveria shqiptare në vitin 2013 për të ngritur shkëmbimet tregtare me Kosovën në 500 milion euro nuk është realizuar.
“Ministri Ahmetaj kishte deklaruar së qëllimi ishte rritja e vëllimit tregtar në 500 milionë. Tani ne kuptuam se shkëmbimet tregtare ishin 200 milion⌂ euro. Pra objektivi i vitit 2013, apo 2014 nuk është realizuar”, deklaroi më tej Baliqi./Telegrafi/