Stomaku ndikon në funksionet e pjesëve të caktuara të trurit
Disa baktere në zorrë mund të rrisin rrezikun e një personi për sulme urie, të cilat mund të çojnë në mbipeshë trupore me kalimin e kohës, tregon një studim i ri.
Në një sërë eksperimentesh, minjtë dhe njerëzit që ishin të prirë për ngrënie të papritur dhe të pakontrolluar kishin nivele të ngjashme të dy llojeve të baktereve në zorrët e tyre – një lloj është i dëmshëm, kurse tjetri është i dobishëm.
Në një raport të paraqitur në takimin e Bashkimit të Shoqatave Evropiane për Neurologji, ekspertët përcaktuan se, duke rritur numrin e baktereve beninje dhe të dobishme blauti, ishin në gjendje të parandalonin ngrënien monotone dhe të pakontrolluar te minjtë.
– Gjetjet e reja janë “shumë të rëndësishme, sepse tregojnë se ky lloj bakteri në të vërtetë mbron nga zhvillimi i varësisë ndaj ushqimit kompulsiv”, thotë Elena Martin Garcia, pjesëmarrëse e studimit dhe asistent profesor në Universitetin Pompeu Fabra në Barcelonë, transmeton Telegrafi.
Zorrët i flasin trurit
Ekipi studioi si minjtë ashtu edhe njerëzit për të parë ngjashmëritë në mikrobiomat e zorrëve.
Pavarësisht se varësia ndaj ushqimit nuk njihet si një diagnozë e vlefshme, nutricionistët e dinë se shumë njerëz e kanë shumë të vështirë të kontrollojnë marrjen e ushqimeve ultra të përpunuara, si ushqimet dhe ëmbëlsirat.
Studiuesit nuk janë të sigurt se si bakteret mbrojnë nga zhvillimi i të ngrënit kompulsiv, por ata kanë disa teori.
– Ne spekulojmë se zorrët komunikojnë me trurin dhe ndikojnë në funksionin e disa pjesëve të trurit, siç është korteksi orbitofrontal, i cili është përgjegjës për vetëkontrollin – thekson Martin-Garcia. /Telegrafi/