“I akuzuari Trajko Veljanovski, nuk ka komunikuar me asnjërin prej të akuzuarve tjerë në rastin “Organizatorët e 27 prillit”, gjatë planifikimit të ngjarjeve të 27 prillit”.
Këtë e thanë avokatët e Trajko Veljanovskit, në seancën e sotme për fjalët përfundimtare. Avokati Elenko Millanov, tha se në 30 mijë mesazhet e Veljanoskit, nuk ka asnjë komunikim në mes tij dhe të akuzuarve Vlladimir Atanasovski (ish-drejtor i DSK-së), Nikolla Boshkovskit dhe Mile Janakieskit, përcjell Telegrafi Maqedoni.
“Nga asnjë dëshmitar i Prokurorisë nuk kemi dëgjuar se Trajko Veljanoski ka pasur komunikim me Vlladimir Atanasovskin dhe Nikolla Boshkovskin. Në këtë periudhë, Veljanoski aspak nuk ka pasur komunikim me Mile Janakieskin. Ndërsa ka gjashtë mesazhe në mes tij dhe të akuzuarit Spiro Ristovski, i cili gjatë asaj kohe ka qenë ministër i Arsimit”, tha avokati Millanov.
Ai gjithashtu tha se më 27 prill 2017, Veljanoski nuk ka dashur dhe nuk ka tentuar të vendos rend kushtetues tjetër në vend.
Sipas avokatit Millanov, nga të gjitha dëshmitë materiale dhe verbale, mund të konfirmohet se Veljanoski e ka udhëhequr seancën e Kuvendit sipas Rregullores./Telegrafi/