Avokati kosovar, Arianit Koci, ka komentuar deklarimet e ish- Raportuesit të Këshillit të Evropës, Dick Marty, lidhur me pretendimet e tij se Tribunali i Hagës ka zhdukur “dëshmitë” e tij të prezantuara në raportin për të ashtuquajturën “Shtëpi e verdhë”.
Koci, përmes një postimi në Facebook, ka thënë se “kur pretendimet e pabazuara të Dick Martyt, ish-raportuesit të Këshillit të Evropës lidhur me shtëpinë e verdhë, pas hetimeve po dalin të jenë të pavërteta, senatori zviceran u kthehet mediave serbe, dhe pohon se Tribunali i Hagës i ka thënë se ‘ato dëshmi lidhur me shtëpinë e verdhë më nuk ekzistojnë dhe se i kanë hequr, sepse edhe ashtu askujt s’i shërbenin’”.
Postimi i plotë i Kocit:
“Kur Marty vajton dështimet e veta
Kur pretendimet e pabazuara të Dick Martyt, ish-raportuesit të Këshillit të Evropës lidhur me shtëpinë e verdhë, pas hetimeve po dalin të jenë të pavërteta, senatori zviceran u kthehet mediave serbe, dhe pohon se Tribunali i Hagës i ka thënë se “ato dëshmi lidhur me shtëpinë e verdhë më nuk ekzistojnë dhe se i kanë hequr, sepse edhe ashtu askujt s’i shërbenin”.
Aludimet e z.Marty janë të qarta: Tribunali i Hagës – një gjykatë me renome botërore, nuk e ka kryer punën si duhet.
Të gjithë e kanë gabim, vetëm ish senatori zviceran e paska mirë.
Sidoqoftë, besoj që një raportues i Këshillit të Evropës, pas dorëzimit të raportit duhet të pres derisa organet tjera t’a kryejnë punën e vet. Në këtë rast Prokuroria dhe Gjykata.
Çështjet penale zgjidhen në Gjykatë e jo në media. Z. Marty, si ish-prokuror e din këtë shumë mirë.
Me deklarimet e tilla, me aludime të qarta, po shkelet parimi i prezumimit të pafajësisë i cili është i garantuar me Kushtetutë, ligje dhe konventa ndërkombëtare, dhe intervistat e tilla mund të cilësohen si tentativë për ndikimin në punën e Prokurorisë dhe Gjykatës”, ka shkruar Koci.
Ish- Raportuesi i Këshillit të Evropës, Dick Marty, ditëve të fundit ka qenë shumë prezent në mediat serbe me pretendimet e tij se Tribunali i Hagës i ka larguar “dëshmitë” e tij lidhur me “Shtëpinë e verdhë”.
Arianit Koci është avokat i ish-Komandantit të UÇK-së për Zonën e Llapit, Rrustem Mustafës-Remit, i cili më 14 janar u intervistua nga prokrori i Prokurorisë Special në Hagë, në cilësinë e dëshmitarit të dyshuar. /Telegrafi/