Agjencitë turistike të udhëtimit dyshohet të kenë marrëveshje mes vete për mbajtje të çmimeve të larta të biletave të aeroplanit gjatë sezonit veror.
Një gjë të tillë e kanë përmendur drejtues të Autoritetit të Aviacionit Civil, pas pyetjeve të bëra nga anëtarë të Komisionit të Zhvillimit Ekonomik, raporton KTV.
Drejtori i këtij autoriteti, Dritan Gjonbalaj, ka thënë se rritja e madhe e çmimeve të biletave në kohë vere është sinjal që jep dyshime se ato kanë marrëveshje mes vete dhe se për këtë duhet hetuar nga Autoriteti Kosovar i Konkurrencës.
Gjonbalaj ka thënë se kjo mund të jetë një nga arsyet pse më 2014 ka pasur 14% më pak udhëtarë sesa më 2013.
Në këtë takim drejtues të AAC-së kanë thënë se Serbia nuk ka bërë ndonjë kërkesë për fillim të vijës ajrore me Kosovën.
Drejtuesit e Autoritetit të Aviacionit Civil kanë thënë se vitin e kaluar kanë pasur mbi 170 raporte për shkelje të rregullave të komunikacionit ajror, një nga më seriozet ka qenë ajo e udhëtimit të kryetares së Gjakovës, Mimoza Kusari-Lila me aeroplan.
Për këtë të fundit kanë thënë të kenë dënuar pilotin, i cili ishte lajmëruar se Aeroporti i Gjakovës është i mbyllur dhe se nuk mund të shfrytëzohet për fluturime, mirëpo ai nuk kishte marrë parasysh paralajmërimet, duke rrezikuar transportin ajror.