Aleanca për Shqiptarët ka reaguar në lidhje me shfuqizimin e aktgjykimit për të akuzuarit si organizatorë të ngjarjeve të 27 prillit 2017, prej ku thonë se kjo është shndërruar tanimë në praktikë e gjyqësorit në vendin tonë.
Nga ASH thonë se kjo konfirmon dyshimet se këto veprime janë të qëllimshme.
“Urgjentisht duhet që të kërkohet përgjegjësi nga gjykatësit dhe fajtorët e tjerë të mundshëm të përfshirë në këto veprime skandaloze. Ndërkohë partitë politike dhe faktorët e tjerë relevant duhet sa më shpejtë të ulen për të filluar procesin e vetingut dhe reformat e tjera të nevojshme në gjyqësor dhe prokurori”.
“Dhuna e 27 prillit 2017 në institucionin më të lartë ligjvënës në vend është një nga ngjarjet më të rënda dhe më skandaloze që nga pavarësia e Maqedonisë së Veriut, për diskreditimin dhe njollosjen e shtetit nga një regjim. Aktet e këtilla duhet të marrin dënimin e merituar për të mos u përsëritur kurrë më në të ardhmen. Në të kundërtën, veprimet e këtilla të gjykatave janë legjitimim dhe inkurajim i krimit dhe terrorizmit”, thonë nga ASH./Telegrafi/