Arteta dhe Edu me fjalë fantastike për Xhakën, po ashtu klubi postoi video dhe shkrime të jashtëzakonshme për mesfushorin pas largimit

Arsenali është përshëndetur në mënyrë emocionale me Granit Xhakën, pas shtatë vitesh të kaluara së bashku, pasi mesfushori shqiptar do ta vazhdojë karrierën te Bayer Leverkusen.

Ai për Arsenalin ka luajtur 297 ndeshje, ndërsa shënoi 23 gola dhe bëri 29 asistime.

Arsenali ka publikuar një video të bukur të Xhakës në rrjetet sociale, ndërkohë ueb faqja zyrtare e klubit londinez po ashtu publikoi një shkrim të gjatë.

Për Xhakën folën edhe drejtuesit e Arsenalit, Edu dhe Mikael Arteta, gjë që ndodh rrallë kur një lojtar largohet.

“Po i themi lamtumirë një lojtari fantastik dhe një personi të dashur për të gjithë ne. Ishte një rrugëtim i jashtëzakonshëm për të dhe ai ka dhënë absolutisht çdo gjë për këtë klub. Ndikimi që Graniti ka pasur te bashkëlojtarët në fushë dhe kolegët në klub dëshmon se sa i popullarizuar ishte”.

Lexo po ashtu Fjalët e para të Granit Xhakës si lojtari i Bayer Leverkusen

“Nuk mund ta falënderojmë mjaftueshëm Granitin për shërbimin dhe kontributin e tij për klubin përgjatë viteve. Ne i dëshirojmë Granitit dhe familjes së tij çdo të mirë në periudhën e ardhshme në jetën e tyre”, ka thënë Arteta.

Edhe drejtori sportiv i Arsenalit, Edu, ka thënë se Graniti ishte pjesë e rëndësishme e klubit për kohë të gjatë.

Lexo po ashtu Zyrtare: Granit Xhaka nënshkruan me Bayer Leverkusenin

“Ai na ka ofruar përkushtim të madh dhe kualitet për shumë vjet. Ka luajtur rol shumë të rëndësishëm në përparimin dhe suksesin tonë. Ai largohet me falënderimin tonë të madh dhe respektin. I dëshirojmë çdo të mirë në të ardhmen”, ka thënë Edu.

Xhaka është transferuar për 25 milionë euro te Bayer Leverkusen./Telegrafi/