Real Madridi po e monitoron nga afër zhvillimin e lëndimit që pësoi Kylian Mbappe gjatë Euro 2024 me Francën.
Franca e nisi kampanjën e tyre në Euro 2024 në mënyrë perfekte mbrëmjen e së hënës me një fitore minimale 1-0 ndaj Austrisë në “Dusseldorf Arena”.
“Gjelat” janë në mesin e favoritëve për ta fituar trofeun në më pak se dy vite pasi arritën në finale të Kupës së Botës 2022.
Sidoqoftë, një lëndim i yllit të tyre kryesor Kylian Mbappe në çastet e fundit të ndeshjes me Austrinë, i vuri një hije të zezë fitores së Francës.
Mbappe e theu hundën pas një përplasje me mbrojtësin austriak Kevin Danso, duke lënë të shqetësuar bordin e Real Madridit që nënshkruan me sulmuesin më herët gjatë këtij muaji.
Teksa fillimisht ishte raportuar se 25-vjeçari nuk ka nevojë për operim të hundës, përzgjedhësi i Francës, Didier Deschamps ka konfirmuar se sulmuesit i duhet t’i nënshtrohet operimit, por jo menjëherë.
Sipas L’Equipe, kjo e ka shqetësuar Madridin të cilët i kanë thënë kampit francez që shpresojnë se Mbappe do t’i nënshtrohet sa më parë operimit në mënyrë që të shkurtohet sa më shumë që të jetë e mundur koha e shërimit të tij dhe ta kenë në gjendje optimale për prezantimin në “Santiago Bernabeu” sezonin e ardhshëm.
Ani pse doktorët e Madridit kërkuan të dinë më shumë për lëndimin, ata ligjërisht e kanë të pamundur të bëjnë diçkap asi francezi mbetet nën kontratë me Paris Saint-Germainin dhe nuk mund t’i bashkohet kampionit spanjoll zyrtarisht deri më datë 1 korrik.
Për më shumë, vendimi për datën e operimit të tij i takon lojtarit dhe teksa mbetet në detyrë me Francën, rikuperimi i tij është përgjegjësi e Federatës së Futbollit të Francës./Telegrafi/