Mikel Arteta mund të krijojë hapësirë për prurje të reja, në rast se plotësohet dëshira e tij për largimin e disa lojtarëve që konsiderohen si të tepërt në ekip.
Drejtori sportiv i Arsenalit, Edu raportohet se ka bllokuar largimin e Jakub Kiwior në afatin kalimtar të janarit, ndërs Cedric Soares mund të lejohet që të largohet.
Dyshja kanë vuajtur për të gjetur minuta nën urdhrat e Mikel Artetas këtë sezon, teksa pesë lojtarë të tjerë janë momentalisht më të favorizuar para tyre.
William Saliba ka luajtur më shumë minuta në Ligën Premier se sa çdo lojtar tjetër i Arsenalit këtë sezon.
Ben White, Gabriel Magalhaes dhe Oleksandr Zinchenko janë gjithashtu lart në listë, ndërsa minuta të mjaftueshme në dispozicion ka pasur edhe Takehiro Tomiyasu, i cili është paraqitur në 12 ndeshje në ligë gjithashtu.
Nëse bëjmë krahasimin, Kiwior ka luajtur më pak së 250 minuta në Ligën Premier ndërsa Cedric ka vetëm një paraqitje në kup.
Sipas asaj që raporton Evening Standard, vendimi përfundimtar për të ardhmen e tyre në Londrën veriore tashmë është marrë.
Kiwior ka oferta të shumta nga Italia, pas periudhës së suksesshme dyvjeçare me Spezian. Njëra ndër ekipet e interesuara është Milani, por që ata kishin mbetur të zhgënjyër nga lajmi se Arsenali nuk e ka në plan ta shesë polakun.
Kiwior kishte pranuar më herët se muajt e tij të parë në Angli kanë qenë mjaft të vështirë për të, por ka shtuar se gjërat po lehtësohen teksa ai po vazhdon të mësojë gjuhën angleze./Telegrafi/