Një shtetas turk është arrestuar dhe një tjetër është proceduar penalisht pasi janë kapur me një sasi kanabis sativa në pikën kufitare të Muriqanit.
“Shërbimet e Policisë Kufitare Muriqan, si rezultat i kontrolleve të detajuara dhe i verifikimeve që kryhen me qëllim parandalimin dhe goditjen e krimeve kufitare, në bashkëpunim me Seksionin për Hetimin e Narkotikëve të DVP Shkodër, goditën një rast të tentativës për të kaluar kufirin, me lëndë narkotike me vete.
Për këtë rast u arrestua në flagrancë shtetasi turk O. T., 25 vjeç, dhe nisi procedimi penal për shtetasin turk M. S., 25 vjeç, për veprën penale “Prodhimi dhe shitja e narkotikëve”, pasi gjatë kontrollit fizik ndaj tyre dhe kontrollit në automjetin me të cilin ata udhëtonin, u gjetën sasi të lëndës së dyshuar narkotike cannabis sativa, të cilat u sekuestruan në cilësinë e provës materiale”, njofton policia.