Policia e Kosovës ka arrestuar njërin nga dy personat e kërkuar për ngjarjen e rëndë, e cila kishte ndodhur më 05.08.2022 (e premte) rreth orës 23:40 në Lipjan, ku kishte lënë të vdekur një person dhe dy të tjerë ishin plagosur.
Sipas raportit 24 orësh të Policisë së Kosovës, arrestimi i tij u bë të martën, në Lipjan.
Siç bëhet e ditur në raport, i dyshuari me vendim të prokurorit është dërguar në mbajtje.
“Më 23.08.2022 lidhur me rastin është arrestuar i dyshuari mashkull kosovar dhe me vendim të prokurorit është dërguar në mbajtje”, thuhet në raport.
Në raportin e Policisë së Kosovës, bëhej e ditur se ngjarja kishte filluar pas një konflikti verbal dhe fizik në mes pesë personave, e cila më pas ka eskaluar edhe me gjuajtje me armë.
Siç thuhej në raport, dy persona kishin shtënë me armë në drejtim të tre tjerëve dhe më pas kanë ikur në drejtim të panjohur.
“Është raportuar se pas një konflikti verbal dhe fizik, dy të dyshuar meshkuj kosovarë kanë qëlluar me armë zjarri tre viktima meshkuj kosovarë dhe janë larguar në drejtim të panjohur. Viktimat janë dërguar në QKUK, ku njëri prej tyre duke mos i përballuar lëndimeve të marra ka ndërruar jetë, vdekjen e të cilit e ka konstatuar ekipi mjekësor”, thuhej në raport. /Telegrafi/