Policia e Shtetit ka arrestuar një person në Durrës, i cilësuar si person me rrezikshmëri të lartë dhe i akuzuar në Spanjë për vrasje në kuadër të një grupi kriminal.
A. M është 49 vjeç dhe i lindur në Durrës.
“Në kuadër të megaoperacionit ‘Sundimi i ligjit’ dhe si rezultat i informacioneve të siguruara nga inteligjenca policore, Drejtoria e Forcës së Posaçme Operacionale, gjatë operacionit policor të koduar ‘Operacionalja 11’, lokalizoi në lagjen nr. 13, Durrës, kapi dhe vuri në pranga shtetasin A. M., 49 vjeç, i lindur në Durrës”, thuhet në njoftim.
49-vjeçari ishte shpallur në kërkim ndërkombëtar, pasi Gjykata e Orgivas, Spanjë,në vitin 2022, i ka caktuar masën e sigurisë “Arrest në burg”, për veprën penale “Vrasja”, kryer në kuadër të grupit kriminal.
Interpol Tirana vijon të bashkëpunojë me homologët në Spanjë, për të finalizuar ekstradimin e 49-vjeçarit, në Spanjë. /Telegrafi/
