Policia e Kosovës, ka arrestuar sot gjatë ditës në rajonin e Gjakovës, personin i cili ishte shpallur në kërkim për shkak të dyshimeve se ka kryer disa vepra të rënda të vjedhjes.
Arrestimin e tij e ka konfirmuar për Telegrafin, Komandanti i Policisë së Kosovës për rajonin e Gjakovës, Kristë Gjoka. Ai ka thënë se i dyshuari është arrestuar me sukses rreth orës 16:00.
“Rreth orës 16:00 në fshatin Rracaj në bashkëpunim me policinë e Deçanit, kemi arrestuar personin e dyshuar për shumë vepra të ndryshme penale”, ka thënë Gjoka.
Ai ka treguar se personi i arrestuar është dërguar në mbajtje prej 48 orëve, dhe pastaj konfrom vendimit nga ana e Prokurorisë do të veprohet më tej.
Policia e Kosovës më 27 të këtij muaji kishte kërkuar ndihmë për kapjen e tij. Ishin publikuar disa fotografi të tij duke kërkuar nga qytetarët që të bashkëpunojnë me policinë.
“Fotot e personit të dyshuar janë siguruar nga kamerat e sigurisë në njërin nga rastet e vjedhjeve, përkatësisht hyrjet brenda në shtëpi dhe shkaktimin e vjedhjes së rëndë”.
“Kërkojmë nga të gjitha mediat e shkruara dhe elektronike që të bëhet publikimi i këtyre fotove dhe të kërkohet nga qytetarët e Republikës së Kosovës bashkëpunim me Policinë e Kosovës, sidomos ata të cilët e njohin dhe e identifikojnë personin e dyshuar”, thuhej në njoftimin e policisë ku kërkohej bashkëpunim për ta arrestuar personin në fjalë. /Telegrafi/