Ministri në detyrë i Bujqësisë, Besian Mustafa, ka folur rreth arrestimeve të fundit në ministrinë që ai e udhëheq për shkak të subvencioneve.
Ai ka thënë në Kanal10 se ka bashkëpunuar me organet e ligjit për t’i zbuluar rastet korruptive me subvencione.
“Tash një vit kam punuar me ekipin tim që të zbulohen këto raste. Do të ishte e paimagjinueshme që në çfarëdo forme t’i fsheh këto me arsyetimin se po bëhemi horë. Mbaj përgjegjësi për punën që kam bërë dhe për suksesin që kam arritur. Puna jonë ka rezultuar me vënien në pah problemet që kanë ekzistuar që 10 vjet”, ka thënë Mustafa.
Ai ka thënë se ka raste kur fermerët janë ankuar për mosdhënien e subvencioneve.
“Shihet se në një hallkë të këtij zinxhiri, diku duket të ketë pasur probleme, prandaj edhe është involvuar hetuesia”, tha Mustafa.
Ndryshe, 11 persona të arrestuar për rastin e njohur si “Subvencioni 2021” kanë dalë para trupit gjykues në Gjykatën Themelore në Prishtinë, pas aksioneve të Policisë së Kosovës më 24 shkurt në Prishtinë, Istog, Lipjan, Podujevë, Gjilan ku janë bastisur disa lokacione dhe janë sekuestruar 400 mijë euro.
Prokuroria e Prishtinës ka kërkuar masën e paraburgimit për L.S dhe 10 personat e arrestuar për keqpërdorim të detyrës zyrtare, marrje ryshfeti, dhënie ryshfeti.
Prokuroria pretendon se të dyshuarit L.S, S. Sh, S. S, B.N, H .M, K. Z, A.U, D. A, P.K, Sh.K dhe K.B- S, duke vepruar në kundërshtim me detyrën zyrtare kanë kërkuar apo kanë pranuar ryshfet nga persona të ndryshëm, kryesisht nga fermerët, në mënyrë që të njëjtit t’i fusin në listat e përfituesve të subvencioneve, ndërsa personi me inicialet A.N., vetëm është shoqëruar në stacionin policor dhe i njëjti është liruar në procedurë të rregullt.