Jason Cummings më në fund e ka marrë fanellën e Olivier Giroud, pas zgjidhjes së një mosmarrëveshjeje që ndodhi gjatë kampionatit Botëror.
Australiani kishte deklaruar se francezi ishte shtirur se nuk dinte të fliste anglisht, kur iu afrua për t’ia kërkuar fanellën pas ndeshjes së fazës grupore në ‘Katar 2022’.
“Derisa po kthehesha te dhomat e zhveshjes së skuadrës sime, përballë meje erdhi Giroud. I fola në anglisht, i thashë se isha një fans i atij dhe se dëshiroja të shkëmbenim fanellat. Por, ai thjesht më kaloi pranë, nuk më foli dhe bëri sikur nuk kuptoi anglisht. Ai tipi ka luajtur për 10 vite në Ligën Premier, thjesht kaloi aty dhe më injoroi”, ishte deklarata e atëhershme e Cummings.
Nuk kishte munguar reagimi i Giroud, i cili i ishte kundërpërgjigjur në mënyrë epike australianit.
“Përshëndetje, Jackson Irvine, si e kam anglishten mik?”, kishte shkruar asokohe ylli i Milanit duke sqaruar se fanellën kishte premtuar ta shkëmbente me futbollistin tjetër të Australisë.
Hi 👋🏼 @jacksonirvine_ How is my english mate? 🤣🤣🤣 🇫🇷❤️🇦🇺✊🏼 pic.twitter.com/McHQP30cCX
— Olivier Giroud (@_OlivierGiroud_) December 22, 2022
Por, tashmë gjërat duket të jenë zgjidhur pas kësaj marrëveshjeje dhe sulmuesi i Central Coast Mariners kishte thënë se do t’ia dërgonin fanellat njëri-tjetrit dhe kjo tashmë ka ndodhur.
“Çfarë legjende Olivier Giroud. Më në fund e mora fanellën tënde, haha. Anglishtja jote është më e mirë se frëngjishtja ime, vëlla. Njeri klasi dhe të gjitha të mirat për sezonin”, ka shkruar Cummings pranë fotografive në Instagram, ku shfaqen dy futbollistët me fanellat e njëri-tjetrit. /Telegrafi/