Sigal Prishtina i rikthehet aksionit pas triumfit në Kupën e Kosovës. Kampionët udhëtojnë drejt Gjakovës për t’u përballur me Rahovecin në ora 17:00 të dielën.
Prishtina deri tash i ka të gjitha fitore, plot 20 fitore nga 20 ndeshje e nëse llogarisim edhe në Kupë, i ka tri fitore tjera që e çon serinë e pamposhtshmërisë në 23 fitore këtë edicion.
Andin Rashica u shpall trajneri më i ri në histori që e ka fituar Kupën e Kosovës vetëm pak ditë më parë.
Arritja e tij është edhe më e veçantë kur dihet se klubi prishtinas i ka të gjithë lojtarët vendorë.
Ditë më parë presidenti i klubit të kryeqytetit e quajti suksesin tashmë të zakontë si special për shkak se është arritur “100 për qind me prodhime vendore”.
Prishtina besohet se do të sjellë një amerikan shumë shpejt për serinë e playoffit në pozitën e organizatorit për të krijuar rotacionin me Valon Bunjakun, Alban Latifajn dhe Rinor Pecin.
Trajneri Rashica është i përkushtuar që të vazhdohet seria pa humbje në kampionat edhe pse tashmë playoffi nga vendi i parë është i siguruar.
Prishtina i shkon Rahovecit shumë të motivuar të dielën në ora 17:00 ku Vreshtarët kanë paralajmëruar atmosfer të nxehtë për mysafirët. /Telegrafi/