Ander Herrera është i pozicionuar mirë për të gjykuar në debatin Lionel Messi-Cristiano Ronaldo dhe ish-mesfushori i Manchester United ka mbajtur anën e shokut të tij aktual.
Spanjolli e kaloi sezonin e kaluar me argjentinasin te PSG, pasi ai iu bashkua klubit francez nga United në vitin 2019. Koha e tij në Old Trafford mund të mos përkonte me asnjërin nga sezonet e Ronaldos atje, por ai luajti përkrah të tjerëve – më së shumti Wayne Rooneyn – të cilët e dinin si ishte të shoqëroje yllin portugez në sulm.
Herrera, i cili mbush 33 vjeç në gusht, e ka parë kolegun Messi të marrë kritika për dështimin për të mbajtur nivelet e tij të mëparshme që nga transferimi në Ligue 1. Megjithatë, ish-ylli i Athletic Bilbaos ka marrë anën e amerikano-jugorit në një nga debatet më të gjata të futbollit.
Messi shënoi vetëm gjashtë gola në ligë për PSG-në pasi iu bashkua klubit nga Barcelona, dhe 11 në të gjitha garat. Këto ishin shifra më të ulëta që nga koha kur iu bashkua Barcelonës, kur argjentinasi ishte ende adoleshent, por Herrera nxitoi në mbrojtjen e kolegut të tij.
“Ju po kërkoni 50 gola në sezon”, deklaroi Herrera për AS. “Nga aty, nëse nuk i shënon, njerëzit flasin”.
“As nuk duhet të harrojmë se Leo ka pasur rekordin e të gjitha kohërave në Ligue 1 – ai ka goditur shtyllën 10 herë! Nëse ai do të kishte shënuar 10 gola të tjerë, do të kishte qenë një sezon shumë i mirë për Leon”.
Ronaldo, ashtu si Messi, ishte në lëvizje verën e kaluar. Ai e kaloi rivalin e tij prej kohësh, duke shënuar 24 herë me ngjyrat e United pasi u kthye në klubin që u largua për herë të parë në vitin 2009, por Herrera vazhdoi të përkrahte Messin.
“Për mua, ai është më i miri i të gjitha kohërave, pa asnjë diskutim”, vazhdoi ai. “Tani e admiroj edhe më shumë për mënyrën sesi e menaxhon jetën e tij të përditshme me përulësi totale, (dhe) gjithmonë me një buzëqeshje për njerëzit”.
Ndërsa rekordi i Messit para portës nuk ishte në nivelet e tij të Barcelonës, ai sërish shënoi golin që vulosi titullin për PSG-në. Ai shënoi 40 ose më shumë gola në një sezon në tetë raste për Barçën, duke arritur kulmin me 73 – përfshirë 50 vetëm në La Liga në sezonin 2011-12. /Telegrafi/