Analisti Maliqi: Për herë të parë fuqitë e mëdha brenda BE-së po i kërkojnë Serbisë njohjen de-facto

Analisti politik, Agon Maliqi, ka komentuar deklaratën e përbashkët të lëshuar të premten pasdite nga kancelari gjerman, Olaf Scholz, presidenti francez, Emmanuel Macron dhe kryeministrja italiane, Giorgia Meloni.

Maliqi ka thënë se kjo është hera e parë që liderë të vendeve të fuqishme brenda Bashkimit Evropian kërkojnë në mënyrë eksplicite që Serbia ta japë njohjen de-facto.

Lexo po ashtu Liderët evropianë me letër të përbashkët: Kosova ta bëjë Asociacionin, Serbia njohjen de-facto

“Mendoj se kjo mund të jetë deklarata e parë zyrtare e fuqive të mëdha të BE-së, në të cilën Serbisë i kërkohet në mënyrë eksplicite të japë ‘njohje de-facto’”, ka shkruar analisti në rrjetin social “X”.

Kancelari Scholz, presidenti Macron dhe kryeministrja Meloni, kanë kërkuar që Kosova të nisë me procedurat për themelimin e Asociacionit të komunave me shumicë serbe, sipas draft-statutit të propozuar nga ndërkombëtarët më 21 tetor dhe që Serbia të jetësojë njohjen de-facto.

“Me qëllim të arritjes së progresit të shpejt në zbatim, ne i bëjmë thirrje Kosovës që të nisë procedurën për themelimin e Asociacionit të komunave me shumicë serbe, siç përshkruhet në draftstatut, ndërsa Serbisë që të jetësojë njohjen de-facto. Formalitetet, përfshirë ato ndërlidhur me adoptimin, nuk duhet të qëndrojnë në rrugën e progresit për këtë çështje”, thuhet në letrën publike.