Autoritetet në Uashington kanë vendosur që rruga në të cilën gjendet ambasada ruse të emërohet sipas opozitarit të vrarë rus, gjë e cila është kritikuar ashpër nga politikanët rusë.
Sipas mediave të huaja, përcjell Telegrafi, rruga në fjalë do të merr emrin e Boris Nemtsov, një kritik i hapur i Vladimir Putinit, i cili u qëllua për vdekje në vitin 2015, ndërsa kthehej në shtëpi nga një restorant në Moskë.
Po sipas mediave, një pllakë e vogël përkujtimore e vendosur në afërsi të vendit ku ai u vra është në shënjestër shpesh nga vandalët, dhe pa respekt edhe nga pastruesit e rrugëve.
Komisioni për riemërtimin e rrugëve, citojnë mediat ka thënë se vendimi për të nderuar “aktivistin demokrat të vrarë” ka qenë unanim.
Vladimir Zirinovsky, kreu i partisë nacionaliste të LDPR, e quajti këtë veprim “një mashtrim të pistë”.
Mediat raportojnë se vajza e Nemtsov, Zhana ishte në Uashington në fillim të dhjetorit dhe miratoi riemërtimin e rrugës. /Telegrafi/