Kryetari i Komunës së Ferizajt, Agim Aliu ka bërë të ditur se situata me vërshimet në komunën që ai drejton është plotësisht e menaxhueshme.
Aliu përmes një postimi në Facebook, tha se me kohë kanë bërë investime cilësore, duke hapur kanal ujor prej 150 kilometrave për të parandaluar vërshimet.
Sipas tij, bllokimet e rrugëve dhe nënkalimeve janë të pakta dhe se nuk janë bërë për shkak të mungesës së cilësisë në punime, por janë shkaktuar nga veprime të papërgjegjshme të qytetarëve.
Njoftimi i plotë:
Të dashur qytetarë!
Reshjet e mëdha e të pandërprera të shiut si në gjithë Kosovën, kanë shkaktuar vërshime edhe në Ferizaj, ndonëse territori ynë është me më së paku dëme e bllokime rrugësh, kjo për faktin se me kohë janë bërë punë cilësore në projekte infrastrukturore ku vlen të përmendet se vetëm gjatë viteve 2019 dhe 2020 është bërë hapja e afro 150 kilometrave kanal ujor për të parandaluar vërshimet.
Situata në Ferizaj është plotësisht e menaxhueshme. Jam vazhdueshëm në terren dhe në kontakt me ekipet emergjente që pareshtur po bëjnë përpjekje ta sanojnë gjendjen aty ku paraqitet më e vështirë.
Bllokimet e pakta të rrugëve dhe nënkalimeve apo dëmet e shkaktuara nga vërshimet në amvisëri apo biznese, kryesisht në bodrume, nuk kanë të bëjnë me mungesë cilësie në punime, porse janë shkaktuar nga faktori njeri, veprime të papërgjegjshme për mbylljen e kanalizimit, për të cilën vazhdueshëm kemi bërë e po bëjmë hapjen e tyre.
Kjo është fatkeqësi natyrore dhe autoritetet lokale po bëjnë më të mirën, për t’iu gjendur pranë banorëve në lokalitete të ndryshme. /Telegrafi/
