Megjithëse ra një pandemi globale dhe anuloi çdo koncert e shfaqje, sukseset nuk munguan për Dua Lipën.
Artistja shqiptare me renome botërore, publikoi albumin “Future Nostalgia” në mars të këtij viti dhe shumë shpejt u ngjit në majat e top listave ndërkombëtare.
Ajo është artistja e parë femër, albumi i së cilës ka kryesuar tabelën zyrtare të albumeve në Mbretërinë e Bashkuar për dy javë rresht.
Tani pas disa muajsh promovimi, albumi “Future Nostalgia” ka arritur të dëgjohet mbi dy miliardë herë në të gjitha platformat e muzikës: Spotify, YouTube, Apple Music etj.
E lumtur për sukses, Lipa ndau me ndjekësit në rrjetet sociale një fotografi të koopertinës së albumit, në mbishkrimin e së cilës tregonte për lumturinë që ndjen me shënimin e këtij suksesi.
“Mbi dy miliardë dëgjime për ‘Future Nostalgia’! Në vetëm katër muaj dhe albumi është duke e bërë këtë! Jam shumë krenare për këtë regjistrim – faleminderit djema … me të vërtetë nuk kam asnjë fjalë për të shpjeguar se si ndihem dhe pëllëmbët e mija janë aq të djersitura thjesht duke e shkruar këtë! Pra, para se telefoni im të rrëshqasë nga duart, ju faleminderit!”, ka shkruar Dua në Instagram.
“Future Nostalgia” është një album me një numër të madh hitesh si: “Don’t start now”, “Physical”, “Break my heart” etj. /Telegrafi/
