Jordi Alba dhe Sergio Busquets e kanë vizituar ish-bashkëlojtarin e tyre, Marc Barta, i cili është duke u shëruar pas plagëve që mori nga sulmet e javës së kaluar drejt autobusit të Borussia Dortmundit.
Qendërmbrojtësi spanjoll iu nënshtrua ndërhyrjes kirurgjike pasi u lëndua nga tri shpërthimet para ndeshjes së Ligës së Kampionëve kundër Monacos.
Njëri prej xhamave të autobusit u thye dhe Bartra pësoi një frakturë, si edhe i kishte mbetur një copëz që po ashtu iu hoq me operacion.
Pas vizitës që i kanë bërë, Alba e ka publikuar një fotografi në rrjetet sociale, në të cilën kanë pozuar së bashku.
“Çfarë kënaqësie që të pamë dhe që ndamë buzëqeshje së bashku, miku im”, ka shkruar futbollisti i Barcës në përshkrim.
Bartra iu bashkua Dortmundit pikërisht nga Barcelona në verën e vitit 2016. /Telegrafi/